【直到嗰一日,我地贏咗】

#轉載連登

如果你仲猶豫緊,聽日去唔去,可以FF下嗰一日,煲底除口罩嗰一日。

每次我FF完,都會充滿力量。以下為個人FF畫面:

直到嗰一日,我地贏咗。

我地會約星期日,出嚟金鐘慶祝,朗讀宣言。
理所當然地,民陣會做大台。民陣可能會約十一點,但一班勇武派,會約返嗰一個時間,612、71嗰個時間——早上六點半。當日,我地會著上黑色衫,full gear,準時到場。

「一、二、三。」我地除低頭盔、眼罩、豬嘴——我地見到對方嘅真樣。嗰一啲熟悉嘅身影,喺前線見過無數次,今日,我地終於睇清楚手足嘅外表。

開始有人喊,係痛哭嗰隻。然後,我地一個個咁喊,現場最缺嘅物資係紙巾。之後,由71入立法會嘅義士上台,大聲朗讀宣言,所有人一齊嗌——光復香港,時代革命。

大台到了,和理非出嚟了,佔領夏愨道係基本。物資全面進場,我地排物資鏈,傳保礦力、飯團同退熱貼。所有嘢準備好了,牧師上台,帶領我地祈禱,紀念死諫嘅手足,我地喊。默站完,我地坐低,食師奶整嘅糖水,睇片,又喊,會有好多人上台分享,尤其係一班被釋放、康復嘅手足,我地見到佢地冇事,太開心,再喊。會有政黨上台,宣傳兩句,我地會嗌下「我愛鄺神」,笑返。

去到晚上,大台要收,我地會左膠地開電筒,唱一次《海闊天空》,喊到仆街,先講再見。但係,我地會留低,拎支鐳射筆出嚟,好似落club咁喪唱歌、跳舞,玩到攰,再由一班父母接放學,返屋企。

我地知道,往後嘅日子,仲有好多嘢要爭取,但係,贏咗呢一場仗,令我地行得更遠。我地嘅未來,仲有希望。

希望你FF完嗰一日,都可以充滿力量,堅持落去:)。

圖:TG GROUP

编辑:MO FO

提交评论

安全码
刷新